Variables සහ Data Types (2 කොටස)

Variables සහ data types පිලිබඳ පළමු කොටසේදී ඉතාමත් සරල අකාරයෙන් පැහැදිලි කරන්න ගත්ත උත්සාහය සාර්ථක වුණා කියල මට හිතෙනවා. :) ඒ පෝස්ට් එකට ඉතාමත් හොඳ ප්‍රතිචාර ලැබුණා. ඒ හැමෝටම බොහොම ස්තූතියි.

මේ පාඩමේදී මම බලාපොරොත්තු වෙනවා Java වල මූලික data types කුඩා වැඩසටහන් කිහිපයක් මගින් ප්‍රායෝගිකව අත්හදා බලලා ඒවායේ හැසිරීම සහ භාවිතයන් පැහැදිලි කරලා දෙන්නට. මේ සඳහා Variables සහ Data Types (1 කොටස) හොඳින් අධ්‍යනය කරලා තිබෙන එක වඩාත් පහසු වේවි.

ඒ වගේම මම primitive data types 8ම විස්තර සහිතව පැහැදිලි කරන්නට බලාපොරොත්තු වෙන නිසාම මෙම පාඩම 3වෙනි කොටසක් දක්වා ගෙන යන්නට සිදු වන බවත් මුලදීම කියන්න ඕන.

class TestVar{
     public static void main(String args[]){
          byte b = 10;
          byte b1;
          b1 = 20;        
          System.out.println("b = " + b);
          System.out.println("b1 = " + b1);
     }
}

මේ java code එක notepade එකට copy කරලා save කරලා, compile කරලා, run කරන්න. එතකොට cmd එකේ මේ වගේ ප්‍රතිපලයක් දිස්වේවි.

දැන් අපි බලමු මේ ප්‍රතිපලය ලැබුනේ කොහොමද කියල. අපි දැනටමත් දන්නා විදියට code එකේ මුල් පේලි 2න් සිදු කරලා තියෙන්නේ TestVar නමින් class එකක් සෑදීම සහ main method එක හඳුන්වා දීමයි. 3න් වන පෙලියෙදී byte වර්ගයේ variable එකක් declare කර එම පෙලියේදීම එය initialize(අගයක් ආදේශ) කර තිබෙනවා. 4වන පේලියෙදී b1 නමින් variable එකක් නිර්මාණය කර එය 5වන පේලියෙදී initialize කර තිබෙනවා. 6 සහ 7 පේලි 2දී එම variable 2කෙහි අගයන් cmd එකේ print කර තිබෙනවා.

මේ වැඩසටහනේ b සහ b1 variable දෙකේ type එක byte වෙනුවට short, int, long, float සහ double යොදා නැවත වැඩසටහන run කර බලන්න. ඒ වගේම විවිධ අගයන්ද ආදේශ කරමින් උතසාහ කරන්න. ඒ ඒ data  type  එකේ උපරිම සහ අවම අගයන්ගේ පරාසයට පිටත අගයන්ද ආදේශ කරලා ලැබෙන ප්‍රතිපල නිරීක්ෂණය කරන්න. බොහෝ විට ඒ ආකාරයෙන් අගයන යොදා වැඩසටහන compile කරනකොට errors එන්න පුළුවන්. බය වෙන්න එපා. ඒ errors හොඳින් අධ්‍යනය කරන්න. ඒ error එකට හේතුව මොකක්ද කියල හිතන්න. තනියම error එක හදා ගන්න උතසාහ කරන්න. බැරිම වුනොත් පහලින් comment එකක් දාන්න... නැතිනම් අපේ FB page එකේ හෝ JException Group එකේ පෝස්ට් එකක් දාන්න.

byte, short, int, long, float සහ double කියන්නේ සංඛ්‍යා ගබඩා කර ගන්න data types නිසා මේ types වල variables භාවිත කරලා අපේ ජාවා වැඩසටහන තුල ඕනෑම ගණිත කර්මයක් සිදු කරන්න පුළුවන්.

class TestVar2{
     public static void main(String args[]){
          int b = 10;
          int b1;
          b1 = 5;
          System.out.println("b = " + b);
          System.out.println("b1 = " + b1);

          int b2 = b + b1;
          System.out.println("b + b1 = " + b2);
         
          int b3 = b - b1;
          System.out.println("b - b1 = " + b3);
         
          int b4 = b * b1;
          System.out.println("b * b1 = " + b4);
         
          int b5 = b / b1;
          System.out.println("b / b1 = " + b5);
     }
} 

මේ code එක run කළාට පස්සේ මේ වගේ result එකක් ඔයාලට දැක ගන්න ලැබේවි.

මේ වැඩසටහනෙත් int වෙනුවට අනිත් data types යොදා නැවත නැවත වැඩසටහන ක්‍රියාත්මක කර බලන්න. විශේශයෙන්ම byte යොදා මේ වැඩසටහන ක්‍රියාත්මක කරවා බලන්න. මෙන්න මේ වගේ errors කිහිපයක් ඒවි. ඒ errors හොඳින් අධ්‍යනය කරන්න.

Variables සහ Data Types 3වන කොටසේදී මං ඒ ගැන පැහැදිලි කරන්නම්.